Бүгін
Киевтің орталығында Грузияның экс-президенті, Одесса облысының экс-басшысы
Михаил Саакашвили ұсталды. Бұл туралы, өзінің дереккөздеріне сүйеніп, «Интерфакс»
агенттігі хабарлады. Алайда, көп ұзамай, оның жақтастары микроавтобустың артқы
есігін бұзып, саясаткерді босатып алды.
Оған дейін экс-президентті Украина қауіпсіздік қызметі үйінің төбесінен
әрең дегенде түсірген еді. Ол үйінің шатырына шығып алып, «Порошенко қарақшыларын»
заңсыздықтары үшін айыптап, төменге секірмек болды. Экс-президентті көлікке
отырғызған кезде, оның жақтастары белсенділік танытты. Олар полиция кортежінің
жолын бөгеп, босатып алды.
Ал таңертең құқық қорғау органдары Саакашвилидің
үйіне тінту жүргізді. Саакашвили Украинаның экс-басшысы Виктор Януковичтің
жақтастарымен ымыралас болды деген күдік бар. Бас прокуратураның пікірінше,
Ураинаның қазіргі президенті Петр Порошенкоға қарсы митингілерді солар
қаржыландырып отыр. Айта кетерлігі, кезекті көтеріліс өткен аптада ғана болды.
